طبعا هم مش بيجروا ورايا علشان يخلوني معيد ,
و لا أنا طالع الأول و لا التاني علشان أبقى معيد ,
أنا يا دوب طالع السابع بالعافية ,
أمال فيه إيه ؟؟
امبارح والدلقيته فجاة بيناي عليا ,
و بيقول لي هو الأول عليكم اتعين معيد و لا لسه ؟؟
طبعا حاجة غريبة إنه يناديلي فجأة كده ,
و إنه يسألني عن زميلي ده ؟؟
و بعدين هو ماله يعني ؟؟ لا هو شافه و لا يعرفه ؟؟
المهم قلت له : أيوة !!
قال لي : طيب !!
بس !!!!
طبعا ما استغربتش ,
و افتكرت إن الوالد كان عاوزني أطلع معيد في الكلية ,
أصلي كنت داخل الكلية " حامي " و عمال أجيب تقدير من أول سنة ,
على عكس إخواتي التانيين و بقيت الناس اللي كانوا بيبقوا مش قد كده في أول سنة ,
المهم أنا نفسي كنت عاوز أبقى معيد في أول سنة دخلتها ,
و أنا في اعدادي - أول سنة - طلعت من الـ10 الأوائل على الكلية كلها - مش قسم ميكانيكا بس - ,
و كنت جايب جيد جدا , و كان الأول بس هو اللي جايب امتياز ,
فروحت البيت و أنا هطير من الفرح ..
طالع من الـ10 الأوائل , و في كلية هندسة بحالة !!
و دي كانت بداية النهاية ....
لما قلت لهم أن اجايب ج ج , لقته بيسألني : حد جايب " ممتاز " - مش امتياز - ,
اتقفلت طبعا و قلت له : آه , واحد بس ,
بصراحة اتخنقت من الرد ,
و العبارة دي جابت لي إحباط لحد دلوقتي كل ما افتكرها ,
و كرهت الزفت الكلية باللي فيها ,
على اللي بيجيبوا تقدير على اللي عاوزين يبقوا معيدين على ....
و رغم إننا لما دخلنا ميكانيكا تاني سنة كنت تاني أعلى تقدير في القسم ,
إلا إني كنت خلاص .. اتخنقت من الدراسة و من حياتي كلها ,
مش بسبب الكلمة اللي فاتت دي بس ,
لكن بسبب حاجات تانية جدت في حياتي ,
حاجات داخلية بوظتني خالص و خلتني يائس و محبط و مكتئب ,
و حاجات خارجية زي مرض جدتي اللي ما أنساش لما كنا رايحين امستشفى قبل الامتحانات بيومين تقريبا ,
ثم مرض والدي بعدها ,
و حاجات كتيرة خليتني أتخنق من كل حاجة ,
أنا مش ببرر لنفسي حاجة ,
أنا فعلا مستوايا نزل ,
لكن أنا كرهت الكلية و العيشة بحالها ,
و ما كنتش بذاكر قد كده ,
ما كنتش بذاكر full load يعني :)
المهم ,
آديني خلصت ,
و ما اتعينتش معيد و الحمد لله ,
و مش " هعبر " حلم حد تاني ,
اللي عاوز يطلع معيد يبقى يطلع هو معيد ,
إنما أنا مش عاوز ,
أنا مش ملزوم أحقق حلم حد تاني ,,,
بس خلاص علشان أنا اتخنقت
.......
