ـ يا مستعجل ... !!! ـ
10:27 م | Author: Abd-Allah ibn Aadam

السلام عليكم و رحمة الله ..

النهاردة هو اليوم الثاني بعد ما عرفت إني خلاص ..

بقيت ظابط ..

و لسه قدامي 3 شهور على ما أبدأ الـ27 شهر بتوع ظابط الاحتياط ..

يعني لسه هفضل في انتظار .. و انتظار ..

المهم قعدت أرجع بالـ(seek bar) بتاع الذكريات ..

لقيتني إني كنت مستعجل جدا أيام الكلية على التخرج ,

علشان أشتغل و أعتمد على نفسي و أستقل ,

لكن سبحان الله ,

من أول ما خلصت , و الأمور ماشية على عكس ما كنت عاوزها خالص ,

بدايةً , أنا مواليد شهر 6 ,
يعني بيكشفوا للجيش في النصف الأول اللي آخرته 30/6

لكن سبحان الله ,
اتكتبت في شهادة الميلاد في أوائل شهر 7

و بدل ما كنت أكشف في شهر 9 و أعرف موقفي في أوائل شهر 10

كشفت في أول 11 و عرفت موقفي في 12 على ما أذكر ..

و طبعا واحد مستعجل , يبقى كان نفسه ياخذ تأجيل ,

لك تأت الرياح بما لا تشتهي السفن ,

اليوم اللي عطلني 4 شهور ده ,
و نقلني مع النصف الثاني في الكشف الطبي كان يوم ( مبارك ) ...

اختاروه لوحده من وسط الأيام ,
و سابوا الأيام الي قبله , و 13 يوم بعده !!

و بكده تستمر مسيرة العطلة , لأني كده دخلت الجيش !!

و برضه فضلت مستعجل ,

قلت أحاول أنزل عسكري , علشان 13 شهر و أخلص ,

و أخرج للعالم و أنطلق بقى ..

و دورنا على واسطة .. لواء قد الدنيا ..

و نزلت في الكشف الطبي لائق ب ,

و كمان نزلت في كشف الهيئة ..

و نزلت عسكري بعدها ..

لكن الموضوع لم ينتهي ,

لازم ( مسيرة العطلة ) تكتمل

لقيت نفسي بقيت ظابط تاني لأنهم احتاجوا ظباط ,
أو احتاجوا تخصص الميكانيكا ..

و بقيت ظابط مرة تانية , ..

و بعد ما كنت هبدأ الخدمة اللي هي 13 شهر بس في 15-1

هبدأ الخدمة الأخرى اللي هي 27 شهر , في 21-4 !!

يعني هاخد وقت أطول .. و هبدأ متأخر كمان !!


.
.
.
.
.

و لسه .. !!!

الله اعلم فيه إيه بعد كده ..

بصراحة أنا خلاااااااااااص ... بطلت استعجال ..

خلاص بقى , زي ما تيجي تيجي ..

و ربنا يقدم اللي فيه الخير ..

بس حبيت أكتب الموشوع ده كنوع من التذكير لنفسي ..

علشان بعد ما أخلص - بعد عمرٍ طويل - أقرأه , و أفتكر ,

و إن شاء الله أقول إن التأخير ده كله كان خير ,

و الحمد لله على إني اتعطلت ..

آمل ذلك ..

....

, , , , | التعليقات (12)
لا كان على البال و لا على الخاطر !!
2:59 م | Author: Abd-Allah ibn Aadam



امبارح كنت قاعد لا بيا و لا عليا ,

لقيت واحد زميلي من اللي كملوا ظباط , باعت لي رسالة , يقول لي : " أنا في مناظرة ظباط الاحتياط في القاهرة ,

و نادوا اسمي و أخدوني غياب " !!

الوادح بصراحة ( بلّم ) شوية , و رحت مكلمه قال لي نفس النظام , و قال لي تعالى في ميعاد المتخلفين يوم

الثلاثاء علشان ما تتخلفش و تاخد سنة زيادة , و يبقوا 4 سنين بدل 3 سنين !!
و قال لي إن فيه ناس كتير اتاخدت غياب و كانوا المفروض انهم نزلوا عساكرمن الأول

الجدير بالذكر إني نزلت لائق ب في العظام و النفسية , و ما عجبتش سعادة اللواء في كشف الهيئة , و تكللت

المهمة بإني نزلت عسكري زي ما أعلنوا في منطقة التجنيد , و رستقت نفسي على إني عسكري خلاص , سنة

واحدة , و هسلم نفسي يوم الأربعاء خلاص !!

و جاني الخبر السعيد !!

طبعا رحت رايح النهاردة منطقة التجنيد التابع لها , و قلت لهم يا جماعة انتوا قلتوا لي أنا نزلت عسكري ,
أمال هم بينادوا عليا هناك ليه مع الظباط ؟؟
و لحسن الحظ لقيت واحد معايا جاي لنفس المشكلة ,

و رحنا رايحين للمكان المختص و ادينا له ورقة الـ110 جند اللي معانا , علشان يتأكد إذا كنا عساكر و لا ظباط و

لا إيه نظامنا بالظبط ؟؟

و كانت النتيحة !!

انت و هو ظابط , و تخلفتم عن المناظرة امبارح , و لو ما رحتوش بكره هتبقوا متخلفين و تاخدوا سنة زيادة !!
و جناب الظابط بيقول لنا مش عاوز أقول لكم كلمة وحشة انت و هو !!

إننا يعني بنتدلع و كنا نايمين و مش عارفين احنا ظباط و لا عساكر !!

و أنا أصلا كنت حاضر يوم ما نادوا , و ما قالوش اسمي في الظباط , و لا حد من زمايلي سمعه - بفرض إني كنت نايم مثلا - و حتى اللي بينادوا اسمه و مش بيرد بينادوا عليه أكثر من مرة ,
فأكيد ما كنتش موجود و ما كنتش ( مسطول ) زي ما بيقول ,

و الشاب اللي كان معايا بيقول لي إنه استنى لحد ما نادوا الأسامي كلها , و راح يتأكد بعينيه من الصول و مالاقاش

اسمه ,
يبقى أكيد احنا الاتنين مش مسطولين يعني !!

المهم , هنروح بكرة إن شاء الله حلمية الزيتون , نتبهدل و نشوف يوم معتبر و ربنا يسهل بقى ..

بدل ما كنت هاخ سنة و أخلص ,

هاخد إما 3 سنين , أو 4 مع المتخلفين !!



الواحد مش عاوز يقول المنحوس منحوس , ..
يمكن يكون خير ..

ربنا يسهل و يعدي العملية على خير ..

دعواتكم ربنا يقدم اللي فيه الخير , و يسهله ..


...

, , , | التعليقات (14)