امبارح كانت ليله عصيييييييييييييييبة جدااااااااااااااااااا
أول مرة تقريبا يحصل لي كده ,
الكابوس إياه بتاع " المخلوق " اللي بيجثم عليا ,
جالي حوالي 3 مرات !!!!!!!!!!!
أيوة 3 مرات في ليلة واحدة !!!
برضه نفس السيناريو ,
نايم و ألاقي اللي ركب فوقي و عمال يخنق فيا و يكتفني ,
و أنا و أنا في الحلم عمال أقول : أعوذ بالله من الشيطان الرجيم ,
و اقرأ سورة الإخلاص و المعوذتين - في الحلم - ,
لحد ما صحيت من النوم الحمد لله ,
و قعدت أستعيذ بالله من الشيطان الرجيم , و أحمد ربنا إني قمت من الكابوس ده ,
و بعد شوية نمت تاني ...
و حصل نفس الكلام ... لحد ما صحيت تاني !!
و بعد شوية نمت تاني ...
و برضه حصل نفس الكلام !!
إلا إنه المرة دي كان مكتف إيدي اليمين و بيخنقني من الجهة اليمين من رقبتي ,
و إيدي الشمال كانت فاضية ,
فكل ما أحاول أفك إيده ألاقيه يبعد إيدي و يخنق أكثر ,
قعدت برضه أستعيذ بالله , و اقرأ قل هو الله أحد و المعوذتين , و برضه مش راضي يروح المرة دي ,
و حيست بحاجة بتقول لي أكن مافيش حاجة تنفعك أو إن القرآن أهه مش قادر عليا أو خلي ربنا اللي بتستعيذ بيه ينفعك أو حاجة زي كده ,
المهم جت لي فكرة - و أنا في الحلم - إني اقرأ في كفي الشمال و أنفث فيه ,
و فعلا , حطيت كفي الشمال على فمي , و بقيت اقرأ فيه قل هو الله أحد و المعوذتين ,
و أمسح بيه على جنبي اليمين و رقبتي اليمين اللي هو مكتفهم و بيخنقهم ,
لكن برضه مافيش حل ,
قعدت أركز في القرآن اللي بقرأه , و استحضر معاني وسرة الإخلاص و المعوذتين و أنا بنفث في إيدي و بمسح بيها على مكان ما هو خانقني ,
و حسيت إنه بيبعد و بيضعف شوية بشوية ,
المهم أنا كنت نايم و وجهي للحائط , و ظهري للخارج ,
و لقيتني - في الحلم - بدفع نفسي للخلف و هو راكب عليا علشان أوقعه من على السرير , و أقع فوقه ,
و فعلا وقعنا احنا الاتنين من على السرير ,
و أنا وقعت فوقه ,
و الحمد لله نزل من فوقي ,
و حسيت بيه - و أنا مش شايفه أصلا - على الأرض وقع , و أنا قمت ,
و قلت أبعد و لا أنزل عليه أضربه ؟؟
لكن صحيت من النوم أخيرااااااااااااااااا و الحمد لله ,
بس الواحد حس إن فيه حاجة خرجت منه ,
لأني كنت بحس كل مرة لما بصحى إن فيه حاجة بتدخل في ظهري ,
لكن المرة دي مش عارف ليه حسيت أو بيتهيأ لي إنه ما دخلش في ظهري زي كل مرة ,
و كمان دي أول مرة على مدى سنتين تقريبا بيجيني فيهم أقدر بعون الله أوقعه من عليا بالشكر ده ,
مش عارف بصراحة ,
هو الواحد صحى من النوم و قعد يدمع شوية كالعادة ,
و هو يأمل أن يكون هذا الشيء قد خرج مني و لن يعود ثانية ,
ربنا يسهل و لو كان ده مس أو جني يكون خرج مني و لا يعود ثانية ,
الواحد بجد زهق ,
و عاوز يعيش زي الناس بقى ,
نفسي بجد دماغي تتظبط و أبطل أفكر في الانتحار و أفكر في الشغل و الجواز و الخلفة زي الناس العاديين ,
و العفريت اللي بيجيلي ده يبطل بقى ,
يااااااااااااااااااااااااااااااااا رب ...
...
12 التعليقات:
أولا حمدا لله على رجوع المدونة بالسلامة,
ثانيا مبارك انتصارك عليه المره دي,
ثالثا ان كانت دي خيالات او حتى مس شيطاني بجد,
ففعلا الحل والسلاح موجود وانت استخدمته وانتصرت بيه
القرآن شفاء من الامراض الجسمية والصدرية واقوى سلاح يستخدم ضد الشياطين,
ومادمت غلبته مره يبقى تقدر تغلبه كل مره وربنا ما يجعل في مره تانيه,
مدوامتك على الاذكار وقرآة المعوذات وقرآة سورة البقرة بالخصوص هي حفظ من حاجات كتير ومنها الجن والشياطين,
بس اهم حاجة المداومه,
عموما ربنا يحفظك من كل شر ويقيك مصارع السوء ويهديك وايانا لما يحب ويرضى وييسر لك كل امورك ويكتب لك الخير في الدنيا والآخرة.
معلش ليا طلبين كده,
اولا الاستاذ اللي فوق ده, ايوه العفريت ده مش مؤدب وآعد من غير هدوم ودي عورة لازم تتغطى حتى ولو عفريت مش ينفع نشوفه كده (:
تاني حاجه المواضيع القديمه فين؟
بسم الله
انا كمان عاوزه اسال الموضوع الاخير اللى زعلنى راح فين
وعملت ايه فيه؟
اظن من حقنا زى ما زعلتنا تفرحنا
فى الاول عاوزه اقولك انا زعلت ليه عشان مش تفهمنى غلط
عادى اننا نغلط ونحس اننا وحشيين اوى ونتخنق من نفسنا
لكن ده بيدفعنا اننا نكون دايما احسن
شعورنا باننا مقصرين ومش نستاهل اى حاجه من نعم ربنا واملنا ان ربنا رحيم ويغفرلنا
دول هما حياتنا
ايوا حياتنا قايمه على كده
وانت عارف ان ربنا سبحانه وتعالى قال اننا لو مش كنا بنغلط وبنستغفر هيجيب قوم غيرنا يغلطوا ويتوبوا
كل حد ينا بيوصل للحضيض كتير
وساعات بيعمل غلط كتير وبيخجل اوى من نفسه
لكن اللى زعلنى انك جهرت بيه
يعنى قلت انا وحش وبعمل كده وان كان عاجبكم
يعنى ربنا ستر عليك وانت تفضح نفسك
دى اللى كانت وحشه اوى بجد
اتمنى تكون استغفرت وتوبت وربنا يتقبل منك
بالنسبه للكابوس
فانا سمعت ان المفروض مش تقوله وتدعى اللهم اجعله خير
لكن فرحت بتفكيرك وانك كافحت عشان تخرج من اللى انت فيه
وركزت على القران
ولو انى حاسه انه مش جن ولا حاجه
حاسه اكتر انها نفسك وبتتخانق معاها
الله اعلم
يارب تكون دايما احسن
سلمى محمد :
شكرا جزيلا لمرورك , الله يسلمك ,
و الحمد لله إن الواحد قدر ينتصر عليه مرة في الحلم .... عقبال الواقع ,
و ربنا يرزقنا الطاعة و المداومة عليها ,
و بالنسبة للعفريت , معلش هو شخصية في أحد الأفلام , و هشيل الصورة إن شاء الله ,
و بالنسبة للمواصيع القديمة , فموجودة في الأرشيف .. بس أنا مش حاطط الأرشيف أصلا :)
د.دينا
شكرا جزيلا لمرورك ,
و بالنسبة للموضوع الأخير فموجود زي ما هو في الأرشيف , و كنت أضفت عليه تحديث علشان أنا فعلا كنت غلط , و أن اما زعلتش من حد و لا حاجة , أنا بس اتخنقت من نفسي أكثر و أكثر ,
و زي ما قلتي إن الجهر بالمعصية غلط , بس الواحد كان حاسس إن الناس واخدة عنه فكرة كويسة , فحب يصلحها و يديلهم الفكرة الصحيحة الوحشة ... يعني جه يكحلها عماها !!
و بالنسبة للكابوس أنا فعلا مش حاطط الموضوع للنشر , يعني أنا كنت حاطه في الأرشيف و المفروض إن الأرشيف مخفي , و مش معروض في المدونة غير موضوع تاني غير ده , و مش عارف إنتوا أصلا وصلتم للموضوع ده إزاي ؟؟
استفسار أخير معلش ,
هو انتوا بجد عرفتم تدخلوا الموضوع ده و تعلقوا عليه إزاي ؟؟
أصلي سامح للمدونة بعرض آخر بوست فقط !! و آخر بوست هو موضوع تاني غير ده ,
و برضه مش حاطط أرشيف المدونة علشان تقدروا توصلوا منه للمواضيع القديمة ؟؟ !!
طيب مال إزاي 2 عرفوا يوصلوا للموضوع ده ؟؟
هو فيه طريقة للوصول للمواضيع القديمة و أنا ما أعرفهاش و لا إيه ؟؟
يا هيما يا جامد
وقعته على الأرض .. وهزمته
طيب ومقلتليش ليه بقى الصبح؟
بص زى ما قلتلك .. علشان أنا خبرة فى الحاجات دى
سورة البقرة والصافات والنور
تقرأهم كل يوم
أو على الأقل تواظب عليهم
وأذكار الصباح والمساء
والدعااااااااااااااااء
ةانت طبعاً عارف إن أسباب عدم قبول الدعاء
إنك تقول زهقت .. أو أدعو فلا يستجاب لى
أصبر .. وإن شاء بعد كام علقة من دول
هوه هياخد ديله فى سنانه ويجرى
يا عم ياسر جامد مين بس ؟؟
ده أنا كنت هعيط من كتر ما هو عمال ييجي ,
و بعدين أنا قلت عليه عادي في المدونة التانية ,
انت اللي مش عارف تراقب بضمير :)
و بالنسبة للأذكار الواحد مواظب الحمد لله ,
و إن شاء الله الواحد يقرأ يسمع أو يقرأ السور اللي قلت عليها ,
و فعلا الواحد محتاج يصبر ,
لأني حاسس إني جازع على الآخر ,
ربنا يهيدنا ,
نفس السؤال بقى معلش ,
انت عرفت تدخل للبوست ده إزاي ؟؟ :D
نفس السؤال بقى معلش ,
انت عرفت تدخل للبوست ده إزاي ؟؟ :D
--------
هيما
بلاش الأسئلة اللى من النوع ده كثير
لأن أنا شخصياً مبقتش عارف
سيبها كده .. وأهى ماشية
على فكرة أنا عارف موضوع الحلم والكابوس
بس إنت مقلتليش عن أخر حلم بس
يعنى أنا قصدى عن أخر حلم
أنا براقب بضمير على فكرة .. وانت عارف كده كويس
الباشمهندس ابراهيم
الموضوع ده هو اللي ظاهر في الريدر عند الناس كلها(((:
والموضوع التاني هو اللي انا وصلتله بالصدفه,
يعني اذا دخلت على البروفايل وفتحت المدونة هتلاقي الموضوع التاني,
لكن ببساطه لو دخلت من الريدر واللي ظاهر فيه العنوان ده هتلاقي نفسك في الموضوع ده,
ورجع الارشيف لاني بحب اقرا الاشعار من وقت للتاني(:
د. ياسر :
ماشي يا عم مش هسأل , هسيبها ماشية و خلاص ,
و معلش آخر حلم ده ما كنتش عاوزه يتنشر أصلا ,
بس أهي " فضيحة رغم أنفي " !!
و عارف و الله انك مش مقصر , بل أنا اللي تقيل عليك اليومين دول ,
استحمل بقى .. غصب عنك :)
سلمى محمد :
!!!!!!!!
أنا فعلا دخلت في مدونتك و لقيت الموضوع التاني ده هو اللي " مشرف " !!!
و الموضوع الأولاني اللي أنا عاوزة يظهر مش ظاهر ,
الظاهر إن blogger خرّف , أو عاملها عند فيا :) ,
و إن شاء الله أنا ناوي أظبط المدونة أو انقلها في عنوان آخر , و هضبطها إن شاء الله و أرجع اللي فات ,
جزاكِ الله خيرا ..
يالا , كل شيء نصيب ...