BPD
ده مش اسم قناة , و لا اختصار لبلد
..ده اختصار لـ :
Borderline Personality Disorder
أما الـ" هههههههههههههه "
فلأن ده آخر تشخيص لحالتي بعيد عنكم 
!!اضطراب الشخصية الحدية
!!من حوالي كام أسبوع كتبت استشارة في موقع اسلام ويب ,
و اتكلمت فيها عن كل حاجة بتجيلي و كل حاجة بعملها و ... كل حاجة ,
و النهاردة بفتح قسم الاستشارات بالصدفة لقيت الاستشارة بتاعتي جاوبوا عليها !!
و الإجابة كانت من دكتور أولاً ثم من شيخ ,
المشكلة إني لما دورت في النت عن : اضطراب الشخصية الحدية ده ,
لقيته حاجة " مش لطيفة " خالص
و إني خطرعلى نفسي و على المجتمع و على الأمن القومي .. و احتمال على البيئة كمان
!!و " الجدير بالذكر " إني من حوالي أسبوع تقريبا عملت موضوع استشارة في موقع آخر ,
و لقيت عندي أعراض " المَسّ "
!! .. معظمها يعني !!و دلوقتي انا مش عارف .. أنا مين ؟؟
قصدي أنا مش عارف أنا دلوقتي ممسوس و " راكبني جوست "
, و لا " ذو شخصية حدية " 
,و لا " أ " و " ب " معاً
,و لا لا توجد إجابة صحيحة و إني " بتدلع " و ده " عادي "
زي ما قالوا لي في استشارات أخرى ؟؟آه طبعا أنا عادي خالص
,حالتي مش خطيرة و الحمد لله ,
و عمال أضحك من الصبح
..هههههههههههه
مش عارف بصراحة أقول إيه ؟؟
ده أنا طلعت " ملغم " و أنا مش عارف !!
فـ" كن حذراً "
!!..
8 التعليقات:
السلام عليكم
اخي الباشمهندس
انا درست موضوع اضطراب الشخصية الحدية ده في مادة علم النفس في الجامعة,وانا لا اجد اعراضه عند حضرتك,
صحيح انا مش طبيبة نفسية,
بس موضوع الاستشارات عن طريق النت ده موضوع فاشل لانهم بيعتمدوا على وصفه لحالته,والطب عمره ما يكون شفوي,
يعني ينفع مثلا واحد عنده اضطراب في دقات القلب والم في عضلة القلب ونهجان,يوصف للدكتور بالتليفون اللي بيحس بيه,يقوله انت مريض بالقلب ويوصف له علاج قلب؟!!
مش ممكن لان ممكن تكون كل الاعراض دي من امراض تانيه وممكن تكون ابسط بكتير,ما الانيميا بتسبب نفس الاعراض,وممكن شوية زعل يعملوا نفس الاعراض برضه,
يبقى لازم الدكتور يشوف الشخص ويحدد حالته,
علشان كده ما تخدش على كلام بالوصف بس,
ومهما كان المرض فربنا قادر يزيله في لحظه,بس المهم الدعاء والرضا,فالرسول صلى الله عليه وسلم اخبرنا ان لكل داء دواء الا الموت.
ربنا يعافيك ويقدر لك الخير.
سلمى محمد ..
و عليكم السلام و رحمة الله و بركاته ..
بصراحة هي الأعراض موجودة .. بس مش باينة , أو مش باينة طول الوقت , أو يمكن ما تكونش أعراض , أو .... مش عارف ,
بس أنا لما قال لي كده , و دورت في النت لقيت أعراض كتيرة من اللي في المواضيع دي عندي , لدرجة إني استغربت بجد !!
بس هو فعلا الاستشارات في النت مش كافية ,حتى هو نفسه - الدكتور - قال لي استشير طبيب علشان تتأكد , و يوصف لك دواء ,
و إن شاء الله هبقى أستشير طبيب , لكن لو ما اترحلتش الأربعاء الجاي :) ,
و ربنا يقدم اللي فيه الخير إن شاء الله ..
لسلام عليكم
زي ما قلتلك تطابق الاعراض مش معناه تطابق الامراض,زي ما انا وضحت,يعني ممكن نفس الاعراض بتشخيصات مختلفة,حتى وان كان,فامر المؤمن كله خير.
وعلى العموم ان شاء الله تكشف وتطمن,وربنا يقدرلك الخير,ويعافيك.
سلمى محمد ,
و عليكم السلام و رحمة الله و بركاته ,
و شكرا جزيلا على التوضيح ,
و إن شاء الله يكون مجرد تشابه في الأعراض فقط ,
و ربنا يقدر اللي فيه الخير ..
جزاكم الله خيرا
هو انا معنديش معلومات في الموضوع دا
بس زي ما الأخت سلمى قالت ,,, يستحيل يكون في كشف بالطريقة دي
سيبك من الكلام دا وإن شاء الله يكون خير
سيبها لله وادعيه هو بس اللي يقدر خرجك من اللي انت فيه :)
ربنا يهدي الجميع
تيفا ,
هو بصراحة أي كشف نفسي بيتهيأ لي إنه عبارة عن كلام ,
و الكلام ممن يتقال وجها لوجه أو عبر الانترنت ..
عموما أنا رحت لدكتور .. و ربنا يسهل إن شاء الله
و ربنا يسهل إن شاء الله
ان شاء الله اصح كلمة انت قلتها
شوف لما خدنا السيكترى فى سنة 2 كل عرض
لمرض الحمدلله لقيناه عندنا :)حتى انا فاكرة استجمعنا شجاعتنا (شوف بقى)ورحنا سألنا الدكتور
بتاع المادة دى اللى هو مين ياباشمهندس الدكتور الاستاذ /احمد عكاشة بذات نفسه اه والله ساعتها
قالنا ان ده شىء طبيعى فى كل البشر وجود
الاعراض يعنى بس لما الاعراض تتعارض مع الحياة الطبيعية للانسان ساعتها يبقى مريض
فهمت حاجة ياصاحبى ؟وانا كمان:)
اللى عايزة اقوله كلنا كده
وبفرض وجود المرض مثلا فالاقرار
بوجود المرض والسؤال عنه
والاعتراف به اول
طريق الشفاء
إن شاء الله
تعالى .
دكتورة نور ,
شكرا جزيلا على المعلومات الإضافية ,
أنا برضه أختي أول ما درست السيكاتري ده قالت لي كلنا حسينا بكده ,
و أي مرض بيدرسوه بتقول لي بيحسوا بأعراضه , حتى الأمراض العضوية !!
و ربنا يقدم اللي فيه الخير إن شاء الله ,
أنا رحت لدكتور و ماشي على العلاج ..
و ربنا يهيأ اللي فيه الخير .