السلام عليكم و رحمة الله و بركاته ,
النهاردة كنت بفكر في حاجة غريبة كده ,
لو مثلا حد من زمايلي - في العالم الواقعي - أو من العائلة الكريمة
دخل المدونة هنا و قرأ اللي فيها ,هيبقى شكلي إيه قدامه ؟؟
مممممممم
بصراحة مش عارف
,بس انا بجد مش بحب حد يكون عارفني في الواقع يقرأ لي على النت ,
و برضه مش عارف ليه
,رغم إن الواحد بيحاول ألا يكتب هنا ما يشين ,
و أن يتقي الله - قدر الاستطاعة - فيما يكتب ,
بس مش عارف ليه لو مثلا أختي أو خالي قالوا لي انت ليك مدونة و لا لأ ؟؟
ههرب من السؤال و مش هديلهم عنوانها !!
طيب دلوقتي أنا عاوز أفهم و اقتنع ..
ليه مش عاوز طالما أنا مقتنع إني مش بعمل حاجة غلط هنا
؟؟يمكن علشان الـ"حاجة الغلط " دي نسبية
؟؟يعني يمكن أنا شايف إني مش بعمل حاجة غلط ,
لكن هي غلط بالنسبة لهم مثلا إني أكتب مواضيع شخصية - أو ذاتية -على النت ,
أو إني أكلم ناس ما أعرفهمش , و كمان من الجنسين ..
ممكن يبقى ده سبب
,أو يمكن أكون فعلا أنا زيهم مقتنع بإن اللي أنا بعمله - أو جزء منه - غلط ,
و بعمله كي يكون عاديا بالنسبة لي فلا أجد تأنيبا ..
يعني بحاول أكسر المحظور اللي مازال بالنسبة لي محظورا كي أجعله غير محظور !!
حد فاهم حاجة !!
طيب نفكر من وجهة نظر تانية ..
لو مثلا كانت المدونة دي لخالي أو لأختي ,
و أنا دخلتها ,
و لقيته كاتب حاجات شخصية - مش شخصية قوي , يعني حاجات عادية عن شخصيته زي اللي أنا بكتبها - ,
و بيتناقش مع رجال و نساء و بيقول رأيه أو بيتصرف بطريقة غير اللي بيعملها في الواقع ..
هيبقى رد فعلي إيه ؟؟
هقول عادي ؟؟؟
متهيأ لي هقول لأ
, مش عادي ,و رغم إني بعمله , مش هرضى غيري يعمله
,مش عارف ده اسمه " تناقض " , و لا " رجعية " و لا " معقد " و إيه بالظبط ؟؟؟
مممممممممممممم
مش عارف ,
مازلت لا أعرف ؟؟
كيف أرضى لنفسي شيئا أراه عاديا .. ثم لا أرضاه لغيري ؟؟
!!!!!!!!!!!!!!!!!!!!
19 التعليقات:
السلام عليكم ورحمة الله تعالى وبركاته
كل الاسئلة دى سألتها لنفسى والله مش انت
لوحدك اللى بيسأل ومش انا وانت بس كتير
من اللى بيكتبوا بيسألوا .انت مثلا عارف
انا والحمدلله مابكتب حاجة عين او غين مثلا لكن
برضه مابقول لحد هنا او فى الشغل على العنوان
يمكن لان ده العالم بتاعنا نعرف فيه اللى عايزينه وبس واللى مش عايزينه مانعرفوش لكن فعلا هو عالمى انا (يعنى انا سيباهم فى الشغل ولا البيت لاجل أجى الاقيهم هنا:)طبعا لأ شكرا مكفينى ما اريد:)
بس ياعنى بالمرة ياباشمهندس ماكنت تكمل جميلك وتتصور ووشك للكاميرا :)بلاش الفن الرفيع ده زى عبد السلام النابلسى فى الفيلم (يوم من عمرى)
المهم انا سعيدة بالتعرف الى حضرتك ياأبراهيم ياللى زهقت من الاختباء:)
أنا قرايبى أغلبهم بيقروا المدونة
وكل ما أكتب موضوع عن والدى أو أجيب سيرته
ألاقيهم يقولوا يا بنتى الناس هتقعد تقول بت مدلعة وهبلة :)
بس تعرف حضرتك الأمور الشخصية بضوابط يعنى عشان متزعلش حد وعشان تفصل فى مسافة لأنك هتضايق جدا لو حد تخطى حدوده معاك
ربنا يعينك ويكرمك .. تقبل تحياتى
دكتورة نور ..
و عليكم السلام و رحمة الله و بركاته ..
الحمد لله إني ما طلعتش لوحدي :) ..
هو فعلا زي ما حضرتك بتقولي إن اللي بنكتبه مش عيب و لا حاجة ,
يمكن يكون زهق فعلا من مشاركتك الحياة الحقيقية و الافتراضية لنفس الناس ,
بس بالنسبة لي متهيأ لي الموضوع مش كده ..
يعني مثلا على سبيل المثال , لو حد من الأسرة الكريمة جه و قعد جنبي و أنا بكتب التعليق ده ,
متهيأ لي التعليق ما فيهوش حاجة عيب , بس هروح إما مصغر الصفحة و فاتح أي صفحة تانية لحد ما يمشي , أو هقفل الجهاز خالص لو العملية قلبت " تناحة " :) !!
رد فعلي ده بيخليني أحس إن اللي أنا بعمله غلط فعلا , لأنه لو كان صح بخبيه ليه ؟؟
و في نفس الوقت أنا مش بخبيه على الجميع , طيب ما فيه بعض الناس عارفهم في الحقيقة و في النت , و بكتب قدامهم عادي ؟؟
مش عارف بصراحة ليه ؟؟؟
-------------
و بالنسبة للصورة :) ..
ده " كده رضا " قوي يا دكتورة , حد طايل وش و لا قفا ؟؟ :)
أي حاجة من ريحتي و خلاص :) ..
و أنا اللي سعيد .. قصدي إبراهيم :) بالتعرف عليكي - من قبل كده :) - يا دكتورة :)
خديجة عبدالله ..
متهيأ لي حاجة كويسة إن قرايبك كلهم يقرأوا المدونة بتاعتك و يقرأوا كلامك ,
و الاجمل إنك فعلا ما تحتاجيش تكتبي كلام في المدونة مش قادرة تقوليه في الواقع !!
و بالنسبة للمواضيع الشخصية ففعلا لازم تكون بحدود ,
لكن المشكلة في المواضيع الشخصية بقدر ماهي في أي حاجةأكتبها , يعني الموضوع ده مثلا , ما أقدرش اخلي حد يقراه برضه !!
شكرا جزيلا لمرورِكو للتعليق أختي الكريمة ..
تحيتي
salma mohamed يقول...
السلام عليكم
اخي ابراهيم:
انت بتتكلم بلسان حالي,انا فكرت في نفس الكلام واجاباتي تقريبا كانت نفس الاجابات.
بس انا عندي اختلاف بسيط ان اهلي عارفين ان لي مدونة واختي لها ايضا مدونة بس انا مش مخبية موضوع المدونة علشان لو اكتشفت هيفكروا اني باعمل حاجة غلط,بس في نفس الوقت محبش حد منهم يقراها,انا واختي بندخل مدونات بعض بس متفقين اننا لا نعلق على بعض ولا نقرا تعليقات بعض على الاخرين سواء في مدوناتنا او مدونات الاخرين,واتمنى ان بقيت اهلي ما يدخلوهاش ولا يقراوا تعليقاتي,
لكن اصحابي اللي في الواقع عارفين مدونتي وبيدخلوها ويقراوها ويعلقوا كمان وعادي,مش عارفه اشمعنى هما؟؟!!
وبالنسبة للكلام الشخصي فالواحد بيضطر انه ما يكتبش كل اللي جواه بالظبط علشان لو حد قراه.
لما تعرف اجابة لاسئلتك لنفسك ابقى قولهالي علشان انا برضه مش عارفه اجاوب عليها ):
سلمى محمد ..
و عليكم السلام و رحمة الله و بركاته ..
للأسف , أو لحسن الحظ , مش عارف أيهما , إننا كتير طلعنا كده ,
يعني ناس كتيرة تلاقيها بتكتب , و ناس تانية تقرأ لها , سواء أصدقاء في الواقع زي ما قلت أو أختك اللي أكيد تلاقيها متقاربة فكريا معاكي ,,
لكن لما نيجي لمنطقة الأهل , معظم الناس لا تحبذ أن يعرضوا عليهم ما يكتبون , فضلا عن مشاركتهم إياه !!
على فكرة , من مناقشتي مع بعض الناس داخل المدونة و خارجها في عض المنتديات بهذا الموضوع , توصلت لأن المشكلة مش في النت بس ,
هي ممكن تكون موضوع خوصية , و ل واحد ليه خصوصياته ,
يعني لو واحد بيكتب حاجة بينه و بين نفسه - مش لمع حد زي النت - لو حتى في كشكول , ليه الحق إن ما حدش يفتح الكشكول و يشوف هو كاتب إيه ,
دي خصوصياته , و مش معنى إنه يخبيها يبق بيعمل حاجة غلط ,
طيب إشمعنى ساعات أسمح إن حد من أصدقائي مثلا يقرأ أشياء معينة - عادية مافيهاش حاجة غلط - و في نفس الوقت لا أحب أن يرى الأهل نفس المحتوى الذي أريه لغيرهم ؟؟
متهيأ لي إن المشكلة مشكلة تواصل مع الأهل ,
يعني للأسف ممكن يكون الأهل زمان مش بيقدروا أي حاجة الواحد يكتبها , فخلاص , مش عاوز أوريهم حاجة علشان لو حتى لم يسخروا منها و قالوا بطل تعيش الدور أو ايه الهبل ده أو ... ممكن يكون الرد بارد و زي قلته ,
فالغالبية بتفضل عدم اطلاع الأهل لى كتاباتهم و تاخدها من قاصرها !!
يعني المسألة مالهاش دعوة بنت و لا غيره , المسألة مسألة علاقة و اتصال الأفرد ببعضهم , و مدى التقبل أو الاهتمام بما يكتبه الآخر ,
ده و الله أعلم طبعا ,
بس دي النتيجة اللي توصلت لها من نقاشي في بعض المنتديات عن الموضوع ده ,
يعني المفروض الخطأ خطأ تواصل أهلي :) - زي تواصل زمالك كده - , تواصل أسري و تقدير أ, على الأقل تقَبٌّل للطرف الآخر ,
فلو الواحد مش هيلاقيه , هياخدها من قاصرها ,
و دي للأسف - ضعف التواصل - مشكلة لوحدها !!
أعتذر عن الإطالة ,
لكن ده كان تلخيص لحوالي 16 مشاركة نقاش حول هذا الموضوع لما حطيته في أحد المنتديات ..
ازيك يا ابراهيم
متهيأ لى انت لا بتعمل حاجه غلط ولا حاجه وحشه .. انت بتكتب خواطرك واللى جواك .. وكمان اما بتزور ناس من الجنسين انت اكيد مش بتعرفهم على حقيقتهم انت بتتعرف على كتابات - فكر - وبتتحاور معاهم بالفكر ويمكن لو قابلتهم ما تعرفهمش .. يعنى لو عمك فشكول قابلك فى الشارع مش حتعرفه .. انت بس تعرف فكره .. وهو ده الموضوع .. تبادل الافكار - عشان كدا ما تزعلش لو حد عرف او حد قرأ لك وعرف شخصيتك .. تحياتى
هيما حبيب قلبي
شوق يا عم ابراهيم
صلي بينا على النبي كده - صلى الله عليه وسلم.
أنا شايف ان اللي انت بتعمله دا له سبب من سببين :
يا إما انك زي حالاتي ملكش اصحاب كتير ,, أو على الاقل مش بتثق في الناس اللي حواليك عشان كده انت بتكتب عن شخصك الكريم ,, وطبعا كل اللي بيردوا في النت عالم مثقفة ,, وزي الفل (مع إن كل واحد منهم فيه عبر الدنيا)
يا اما بقى حضرتك فاضي ومش لاقي حاجة تعملها زي حالاتي برضو..
المشكلة يا ابراهيم اننا بنعيش في العالم دا بجد ومش عارفين نخرج منه لاننا اصلا مش عايزين نخرج ومش عارفين هنخرج نروح فين ,, فبنسنتسهل ونكمل هنا وخلاص ..
أنا اصلا ميهمنيش إذا كان اللي حواليا هيقرأوا الكلام ولا لأ ,, لأني لو كانوا هيفهمومه ويقدروه مكنتش احتجت اكتبه ...
المشكلة التانية في حتة الصراحة دي بالذات مع الناس اللي متعرفهمش ...
يعني مثلا كتير لما بتشوف شخص من خلال كتاباته على النت ,, يحسسك إنه عالم لا يشق له غبار ,, ولما تكلمه شخصيا تلاقيه فاضي ,, ووتحس إنه مش قد كده .. بس أهو في قافلة المخدوعين في نفسهم ...
قليلين قوي اللي بيتكلموا بصراحة ,, وتحس بجد إنهم كده مش بيتصنعوا ........
من الآخر ,, اللي احنا بنعمله دا غلط ومش غلط .. ازاي؟
غلط انك ساعات بتعمل حاجات انت رافضها اصلا .. زي موضوع الجنسين دا .. بس عشان تثبت لنفسك انك تعرف تعمل كده بس انت مش عايز ..
ومش غلط ,, لأنك أكيد هتستفيد من الكلام ,, بعيدا عن خلفياته اللي انت مش شايفها ..
و ساعة الصراحة تلاقي الكل يفلسع ... لأن محدش عايز يواجهها حتى على النت .. مع انك عايش هنا عشان تكمل اللي مش لاقيه برا..
المهم إني احط في دماغي ان دا مش عالمي ودا مش هعيش فيه علطول ... بتعرف على ناس واعتزيت بصداقتهم بجد ,, ومنهم انت :) بس في الاخر النت مش هو اللي هيجمعنا ,,
الاحترام اللي هيفضل بينا هو اللي هيخلينا نكمل معرفتنا ببعض :)
و بكرة هتتشغل في الدنيا ومش هتبقى فاضي أصلا تبص للحاجات دي ...
حاول تستفيد من الفترة دي على قد ما تقدر وخلاص
وربنا يهدي الجميع :)
أستاذ فشكول ..
أهلا و سهلا بحضرتك ..
هو فعلا كلامك صحيح,
احنا بنتعرف على رؤوس و ليس على شخصيات ..
يعني زي ما حضرتك قلت , أنا مثلا لو حد من اللي أعرفهم في المدونة شافني في الشارع مش هيعرفني ..
لكن ده في حد ذاته .. مممم مش عارف إن كان يعتبر تناقض و لا لأ , متهيأ لي لأ ,
لكن المشكلة تكمن أكثر في إني اُطلع من هم في العالم الحقيقي من الأسرة و غيرهم على ما أكتبه ,
بحيث أن يكون الواقع كالنت ..
بس ده متهيأ لي محتاج تقوية الصلات بين الأفراد , علشان يتقبلوا ما اكتب , أو أنلا أحرج من أن أريهم ذلك ..
متهيأ لي يعني
عموما شكرا جزيلا لحضرتك على الإضافة ..
و شكرا جزيلا على الزيارة ..
تحيتي
مصطفى ..
هرجع لك بعدين علشان مستعجللللللللللل
السلام عليكم
شكرا ياباشمهندس,على ردك
هو ممكن يكون فيه جزء من الاسباب اللي قلتها صحيح,نقطة التواصل ورد الافعال,فعلا قريب انا خليت احد افراد الاسرة يقرا حاجة انا كتبتها,ورد الفعل كان(نو كومنت)يعني ولا كأن خالص,سكوت تام,ولا حتى اشاره او كلمة,ولا حلو ولا وحش,
فبالتالي انا اتحرجت من نفسي وقررت اني ما اطلعهمش على حاجة تاني,الانسان بيحتاج تواصل,بيحتاج ناس تفهمه وتقدره,
حاجة تانية,ساعات بنكتب خصوصيات بيكون الاهل سبب في جزء منها,او اننا مش عاوزنهم يحسوا بمعاناتنا,او ردود افعالهم هتحبطنا,علشان كده مش بنحب اطلاعهم عليها,وساعات كمان بنفضل انهم ما يعرفوش طريقة تفكيرنا في موضوع معين لانهم عندهم صورة معينه في ذهنهم واالواحد بيكون مش عاوز يعمل شوشرة لنفسه,........حاجات كتير اوي
لكن الى الان في نقطة انا مش فاهماها ليه بنحس ان ضميرنا في حاجه مش مرتاحه؟
انا اللى شاكر يا ابراهيم علىالزياره والتعليق وكمان خليك معايا على طول وانت تلاقى موضوعات هايله على قد عمك فشكول
تحياتى
السلام عليكم
عندي سؤال بس نسيت اساله
هو ازاي حضرتك بتمسح التعليقات المحذوفه,زي لما كتبت تعليق وعملت حذف,ورجعت كتبت تاني,بيبقى مكتوب تعليق محذوف بواسطة المؤلف,او حتى لو حذفت تعليق في مدونتك مش عاجبك,المفروض بيبقى مكتوب تعليق محذوف,ازاي بتشيله خالص؟
teva
السلام عليكم يا مصطفى ,
بص يا مصطفى ,
أنا مش هطول لأني مش عارف أطول أصلا :)
المهم ,
بالنسبة للنت فزي ما انت قسمتهم و أنا متفق معاك ,
إنما أنا أحب أوضح طائفة من اللي بيكتبوا على النت و مش بيقدروا يواجهوا المجتمع بكتاباتهم دي ,
فدول نوعين ,
إما أصلا مش بيقدروا يتصلوا بالناس , و غير قادرين على إبداء رأيهم لغيرهم , بصرف النظر إن كان على النت أو لا ,
يعني هم بيكتبوا على النت مستترين برضه لأنهم يخجلون من كشف شخصيتهم لأنهم لا يستطيعون التواصل الحقيقي ,
و دول لازمهم دورة
communication skills
زي اللي انت أخدتها في الـMIE
:) :)
و نوع تاني من اللي مش بيسمح بعرض كتاباته على الن و في الواقع برضه , لكن مش لضعف اتصاله بالآخرين و فقده لتلك المهارات ,
لكن لأن فيه حاجة موجودة عند ناس كتير - و أن امش منهم - اسمها الخصوصية !!
فيه حاجة اسمها خصوصيات , كل واحد حر يوري للناس اللي هو عاوزه و يخفي اللي هو مش عاوزه ,
لكن للأسف الكلمة دي مش موجودة في قاموس تربيتنا ,,, معظمنا يعني ..
بس خلاص :)
طولت و لا لأ ؟؟ :)
أستاذ فشكول ,
لأ , ده أن االلي شاكر :) :)
و إن شاء الله هتابع حضرتك لازم ..
شكرا جزيلا لحضرتك ..
سلمى محمد ,
و عليكم السلام و رحمة الله و بركاته ..
للأسف أنا معاكي في نقطة التواصل و الموقف اللي حصل لك خير دليل ,
و فعلا رد الفعل الطبيعي لأي واحد إنه هيبطل يوريهم حاجة .. هو إيه اللي جابره على كده ,
و طالما رأيهم سلبي أو هدام يبقى بلاشه خالص - ده تفكير الواحد كده يعني - ,
أما بالنسبة للخصوصيات ,
فدي غالبا - أو دائما - مش بنحاول نخليهم يقرأوها لأنهم إما جزء من المشكلة , أو هم في المشكلة ,
فبنكون أصلا عاوزين وجهة نظر خارجية تفيدنا ,
و احتمال برضه إن الواحد يكون مش عاوز حد يغير فكرته أو قناعاته المسبقة عننا ,
يعني هم مثلا مفكراني حاجة معينة , و أنا لم أعطهم تلك الفكرة عني أو أصرح بها ,
لكن قناعتهم عني كده ,
فخليكم زي ما اخترتم تشوفوني !!
الجزء الأخير و اللي خانقني فهلا هو حتة الضمير و ليه بنحس إننا بنعمل حاجة غلط ,
لما حطيت الموضوع ده في بعش المنتديات لقيت من إجابات الناس إن ده عادي , لأن الواحد مش متعود على كده بس ,
و فيه راي عجبني قال : إن كل واحد مفروض إنه ناضج و ليه خصوصيات , لكن في مجتمعاتنا ما اتعودناش أ, اتربينا على إن واحد يكون ليه خصوصيات ليه لوحده - و طبعا مش سيئة - , فلما بيحاول يحافظ على خصوصيته في مجتمع يسيء الظن بالخصوصية بيبق زي اللي عامل عمله , لكن دي حاجة طبيعية - زا ما قالوا لي - !!
و الله أعلم ..
و لو إني أفضل إني أريهم ما أكتب , حتى و لو لم أحظى بتشجيع أو حتى إن حظيت بتثبيط ,
لكن بدون حثهم على القراءة , لكن بإتاحة ما كان خارج الخصوصيات لهم , من شاء أن يقراه يقرأه , و من لم يشأ فذاك ..
بس خلاص :) ..
و آسف على الإطالة ..
آه بالنسبة لحذف التعليقات نهائيا بدون أن توجد كلمة " محذوف بواسطة المؤلف " فدي ما تقدريش تعمليها إلا في مدونتك بس ,
حتى تعليقاتك في مدونات الآخرين لا تستطيعين حذفها نهائيا ,
إنما تستطيعين حذف أي تعليق في مدونتك سواء كان تعليقك أم تعليق غيرك , بالطريقة العادية و بالضغط على رمز سلة المهملات , ستفتح لك صفحة أخرى فيها زرين : حذف التعليق , تراجع .
لكن قبل أت تضغطي على " حذف التعليق " فيه حاجة جنبه اسمها :
check box مكتوب عليه " إزالة على الأبد "
تعلمي عليه بعدين على " حذف التعليق " ,
و بكده هيروح خالص بدون أن يترك عبارة " بواسطة المؤلف " دي :)
تحيتي
السلام عليكم
جوزيت خيرا ياباشمهندس
معلش انا اسفة حذفت تعليق(غير معرف)لاني زي ما قلت ما بحبش حد يقرا تعليقي على الاخرين وكده لو اختي دخلت تقرا التعليقات عندي هتقراه.
آآآآآآآآسفة جدا.