امبارح كنت قاعد لا بيا و لا عليا ,
لقيت واحد زميلي من اللي كملوا ظباط , باعت لي رسالة , يقول لي : " أنا في مناظرة ظباط الاحتياط في القاهرة ,
و نادوا اسمي و أخدوني غياب " !!
الوادح بصراحة ( بلّم ) شوية , و رحت مكلمه قال لي نفس النظام , و قال لي تعالى في ميعاد المتخلفين يوم
الثلاثاء علشان ما تتخلفش و تاخد سنة زيادة , و يبقوا 4 سنين بدل 3 سنين !!
و قال لي إن فيه ناس كتير اتاخدت غياب و كانوا المفروض انهم نزلوا عساكرمن الأول
الجدير بالذكر إني نزلت لائق ب في العظام و النفسية , و ما عجبتش سعادة اللواء في كشف الهيئة , و تكللت
المهمة بإني نزلت عسكري زي ما أعلنوا في منطقة التجنيد , و رستقت نفسي على إني عسكري خلاص , سنة
واحدة , و هسلم نفسي يوم الأربعاء خلاص !!
و جاني الخبر السعيد !!
طبعا رحت رايح النهاردة منطقة التجنيد التابع لها , و قلت لهم يا جماعة انتوا قلتوا لي أنا نزلت عسكري ,
أمال هم بينادوا عليا هناك ليه مع الظباط ؟؟
و لحسن الحظ لقيت واحد معايا جاي لنفس المشكلة ,
و رحنا رايحين للمكان المختص و ادينا له ورقة الـ110 جند اللي معانا , علشان يتأكد إذا كنا عساكر و لا ظباط و
لا إيه نظامنا بالظبط ؟؟
و كانت النتيحة !!
انت و هو ظابط , و تخلفتم عن المناظرة امبارح , و لو ما رحتوش بكره هتبقوا متخلفين و تاخدوا سنة زيادة !!
و جناب الظابط بيقول لنا مش عاوز أقول لكم كلمة وحشة انت و هو !!
إننا يعني بنتدلع و كنا نايمين و مش عارفين احنا ظباط و لا عساكر !!
و أنا أصلا كنت حاضر يوم ما نادوا , و ما قالوش اسمي في الظباط , و لا حد من زمايلي سمعه - بفرض إني كنت نايم مثلا - و حتى اللي بينادوا اسمه و مش بيرد بينادوا عليه أكثر من مرة ,
فأكيد ما كنتش موجود و ما كنتش ( مسطول ) زي ما بيقول ,
و الشاب اللي كان معايا بيقول لي إنه استنى لحد ما نادوا الأسامي كلها , و راح يتأكد بعينيه من الصول و مالاقاش
اسمه ,
يبقى أكيد احنا الاتنين مش مسطولين يعني !!
المهم , هنروح بكرة إن شاء الله حلمية الزيتون , نتبهدل و نشوف يوم معتبر و ربنا يسهل بقى ..
بدل ما كنت هاخ سنة و أخلص ,
هاخد إما 3 سنين , أو 4 مع المتخلفين !!
الواحد مش عاوز يقول المنحوس منحوس , ..
يمكن يكون خير ..
ربنا يسهل و يعدي العملية على خير ..
دعواتكم ربنا يقدم اللي فيه الخير , و يسهله ..
...
14 التعليقات:
السلام عليكم
؟؟؟؟؟؟؟؟؟؟؟!!!!!!!
هو ده كان رد فعلي
عموما ربنا يقدرلك الخير
الجيش ده عجب ومواقفه اغرب,اخويا مثلا لابس نظارة واصحابه اللي نظرهم احسن منه نزلوهم عساكر وهو ادوله لائق أ,يعني ظابط وراح المناظره وكل شويه يعمل تظلم ولسه هيروح الاربعاء يعيدوا كشف عليه,لكن برضه بيحسبوه بيتلكك؟!!!
المكتوب على الجبين لازم هتشوفه العين زي ما بيقولوا.
و عليكم السلام و رحمة الله ..
للأسف رد فعلي كان زي رد فعلك ,
و لقيت 2 زيي كده النهاردة جايين على آخر لحظة بعد ما كانوا مفكرين إنهم عساكر خلاص !!
و فيه ناس كتير كانت غايبه عن كشف التخلفات بتاع النهاردة , لأن أكيد ما عرفوش أصلا إنهم بقوا ظباط !!
و طبعا ما حدش يقدر ينطق , هيقولوا له انت اللي كنت نايم , أو بتستهبل أو ...
هم شكلهم اتزنقوا في التخصص لأن ما أخدوش ميكانيكا تخصص خالص المرة دي , راحوا مطلعيننا تاني ظباط , أو بقى كان الكشف ناقص في أول مرة أو ... الله أعلم
, و بالنسبة لأخوكي شكلنا كده هنبقى زمايل :) و هنبقى في كلية واحدة - كلية ظباط الاحتياط - ,
هو بالنسبة للنظارة مش أي نظارة بينزل , لكن لازم نظره يكون أقل من (-4) على حد علمي ,
و مش هو لوحده اللي مظلوم كده,
أنا واحد بيحلف لي إن واحد زميله كان مركب مسامير في دراعه , و آثارها باينة , و قالوا له لائق عادي !!
دي ما بقتش حاجة تزعل , أصل احنا أكيد .. أكيد في مصر !!
مش وحشة على فكرة ، اسمع ان الظباط مش بيتبهدلوا زي العساكر ، قدر الله وماشاء فعل
السلام عليكم
ربنا يقدرلك الخير ويرضيك بيه
ويا عالم ممكن فعلا تبقى انت واخويا زمايل هناك,
ولو كان اخويا بيحب المدونات كان ممكن يتعرف عليك من قبلها بس هو مش بس مش بيحبها وبيكره حبي ليها فمش بكلمه خالص عن تدويناتي ولا مدونات الاخرين ):
وعليكم السلام ورحمة الله وبركاتة يا باشمهندس ابراهيم
للاسف ان مش مع حضرتك ، يا صديقى العزيز الحقد دفين والنفوس مريضة او على الاقل مضللة باعلام مزيف ، ولا نلوم انفسنا لان العيب فى قياداتنا المضللة والباحثة عن زعامة خادعة
وبالنسبة لتجنيدك ففية الخير ان شاء الله لك ولزميلك
لك تحياتى
واضح إني عرفت الخبر متأخر :(
قدر الله وما شاء فعل يا إبراهيم.
إن شاء الله خير وهيعدوا هوا إن شاء الله :)
ربنا معاك ويعينك ويوفقك إن شاء الله.
يا باشمهندس
قصدي يا حضرة الضابط ..... ما تخافش من التهديد انت لسه ما لبستش ميري كبيرهم هتبقي متخلف عن الدفعة و و تدخل في شهر ابريل
و ايام الجيش الممله بتعدي سواء جندي و الا ضابط
و بعدها الدنيا تتفتحلك يا هندسه
ربنا يكرمك
تحياتي
صحفية غلباوية ..
للأسف هي سمعة بس ,
الظباط بيتبهدلوا 6 شهور بدل الـ45 يوم :(
و إن شاء الله كله خير ,
قدر الله و ماشاء فعل .
سلمى محمد ,
و عليكم السلام و رحمة الله ,
ربنا يرضينا كلنا و يهيء لنا الخير بإذنه ,
و ربنا يكتب لنا الخير أنا و أخوكي و الجميع سواء في كلية ظباط الاحتياط أو في غيرها ,
و على فكرة الطبيعي إن أخوكي يكره المدونات و النت و الحاجات دي ,
معظم زمايلي كده برضه ,
أستاذ بيرم المصري ,
هو فعلا الواحد بقى مش عارف حاجة ,
بالذات في السياسة و اللي فيها دول
ما تعرفش فين الغلط و مين اللي بيكذب و ...
ربنا يعافينا منها ,
و ربنا يكتب لنا الخير في الجيش أو خارجه إن شاء الله
تحيتي لمرورك أستاذي
تيفا ,
و لا متأخر و لا حاجة يا مصطفى ,
أنا نفسي عرفته متأخر :) !!
و النهاردة تأكدت بجد إني كنت فعلا عسكري و هم طلعوني ظابط !!
دكتور أحوال الهوى ,
هو الواحد مش خايف الحمد لله ,
الواحد زهق بس من كتر " الركنة " !!
الواحد مخلص كلية من شهر 6 و قاعد لحد دلوقتي لحد ما حس إنه نسى كل حاجة !!
ربنا يكتب لنا الخير حيث كان و يرضينا به ..
السلام عليكم ورحمة
الله تعالى وبركاته
قدر الله وماشاء فعل
هذا قدرك ولا فكاك منه
تعدى على خير بأذن الله
دكتورة نور ..
و عليكم السلام و رحمة الله و بركاته ..
هو الحمد لله الواحد بجد المرة دي راضي بجد و الحمد لله ..
لأن كون الأسباب كلها اللي نزلت بيها عسكري تتبخير بين يوم و ليله , يبقى ربنا أراد إني أدخل ظابط أو إن ده يحصل ,
و إن شاء الله قضاء الله كله خير .
شكرا جزيلا يا دكتورة .. :)